Leo con tanta avidez
que esquezo as palabras
pero sei onde están
no bulbo raquítico
da miña alma
abrasada de suor
de maldita esperanza
de ollos verdes
e daltónicos
con veas instauradas
por onde circulan
estreliñas
estigmatizadas
mais sen astigmatismo
con profunda miopía
de non ver máis que letras
onde só hai puntos e liñas
ignorante na teletransportación
no idioma do imperio
e no pasaporte comunitario
egoísta esgotado
de non dar nin recibir
non falo de sexo
aínda que o semelle
falo de sexo e moito menos
o cristal co que se mira
aumenta a desigualdade
a tristeza cada vez máis triste
a felicidade cada vez máis feliz
o poema cada vez máis falaz
perdido no bosque
facéndolle fotos ás sombras
precipiteime no río
recollín moitas pedras
metínas nos petos
sinto ser pesado
mais é así